TRESLLÁU DE DIREICIÓN POR PROBLEMES TÉUNICOS

LA NUEVA DIREICIÓN YE:


http://fueyaenblancu.blogspot.com/

http://fueyaenblancu.blogspot.com/

http://fueyaenblancu.blogspot.com/

http://fueyaenblancu.blogspot.com/

Videu elleutoral d'Unidá

Escontra la tortura ¡Nin Uviéu nin nenyuri!

Otru añu más hemos de carecer n'Uviéu la cellebración d'un "festexu" xabaz y cruel, y ayenu dafechu a la nuesa cultura, poro, l'asociación defensora de los animales ANADEL como yá fexo n'otres ocasiones tien convocada una manifestación pal día de la corrida, que saldrá del Paséu de los Álamos esti sábadu a les 17:00h.

Con nomes y apellíos estos son los responsables:

-L'Ayuntamientu d'Uviéu que pagará 60.000 euros pola organización de la corrida, sigún el conceyal de "Cultura" y presidente de la Sociedá Uvieína de Festexos (SOF), Alfonso Román López, y recibirá 2.700 entraes de baldre que se repartirán pelos centros sociales del conceyu pa que la plaza nun quede vacia.

-La empresa Toros Suerte Natural qu'organizará la corrida de l'Ascensión.

-Los asesinos que comparten cartelu; Pablo Hermoso de Mendoza y los hermanos Francisco Rivera Ordoñez y Cayetano.

L'alxudicación foi aprebada na Comisión de Cultura del Ayuntamientu, cola oposición de Roberto Sánchez Ramos.

¿Fasta cuando hemos de sofrir esta tortura nel nuesu país? Pel momentu vemonos el sábadu na manifestación escontra la tortura.



Un saludu.

Prepárase la rempuesta escontra'l G8

Yá se tán cociendo les actividaes de la Cume Alternativa al G-8 que quier dar amuesa de que'l conxuntu del movimientu altermundialista o antiglobalización caltien encesa la so actividá y la so engarardiella al respeutive del erru que suponen les polítiques neolliberales que mos llanten día tres día. Estos Xefes de Gobiernu de los países más poderosos del mundu aconceyen cada año pa falar y tomar dicisiones sobre toos nós, sobre problemes que mos afeuten como habitantes del planeta. Temes arreyaos a la inestabilidá de los mercaos financieros, el problema de les migraciones, la democratización de les instituciones europees, el cambéu climáticu, los problemes de la delda y de la probitú nel tercer mundu y en particular nel continente africanu o'l problema de la enerxía.

No que cinca a les movilizaciones, yá tán programaes delles demientres esti mes de mayu, en defensa de los intereses de los ciudadanos y inmigrantes venceyaos a la Cume del G-8. Van siguir de magar xunu, cuando se prevén desplazamientos conxuntos n'autobús o en tren pa confluyir n'Alemaña: dende Noruega, Suecia y otros países escandinavos; dende los estaos de Francia, Suiza, Holanda, Bélgica, España y Portugal y dende Austria, Italia o Hungría.

Dende esti humilde blogue voi intentar facevos llegar tola información qu'atope de lo asocedíu n'asturianu y cola mayor rapidez posible.

¡EL 7 DE XUNU VEMONOS NES CAIS!

Un saludu.



contadores de visitas

Internet podria enllenase dafechu a fines d'esti añu

Alitaos pol deséu de saber si internet acuta espaciu pa los miles de millones de bits que se xuben diariamente, la consultora internacional IDC dicidió facer una investigación inédita na que se cuantifique la medría de la información dixital en tol mundu.

Ún de los resultaos más sosprendentes que xurdió del informe ye que, namái nel añu 2006, el volume de datos espublizaos na rede foi de 161.000 millones de xigabytes, un númberu 900.000 veces más grande que la información esistente en formatu imprentáu. Esa cantidá equival a enllenar 1.191.400 biblioteques del tamañu de la del Congresu de los Estaos Xuníos (la más grande del mundu, con más de 29 millones de llibros).

La bayura documentos xubíos promete nun aparar: l'informe de la consultora alvierte que l'universu dixital medrará un 57 % per añu, dende'l 2007 fasta'l 2010.

Si, como fasta agora, se siguen creyando millones de páxines ueb cada añu; si les cuentes de corréu continúen xorreciendo o si'l númberu de blogues se duplica cada seyes meses, el probable enllenamientu d'internet nun paez tan llonxanu.

Qucias pal añu que vien la blogosfera asturiana, que yá entamaba a medrar, dexe de furrular por mor d'esti asocedíu, ye una pena la verdá, pero esperemos que nun seya asina.

Un saludu.

XXVIII Día de les Lletres Asturianes

Otru añu más el día de les lletres desendolcase nun doble sen, per un llau, ye otru día más na xornada vindicativa d'un drechu irrenunciable como ye la oficialidá, drechu que reclamamos saliendo otra vuelta a les cais, y pel otru ye un día nel que cellebramos la bayura y calidá de les nueses lletres col actu entamáu pola Academia de la Llingua Asturiana nel teatru campoamor.

Manifestación que tuvo un calter más especial qu'otres, porque resulta que nesti mes de mayu vamos tener unes elleiciones nes que vamos escoyer los nuesos representantes políticos na Xunta Xeneral por otros 4 años, llexislatura na que se fadrá'l remocique del nuesu estatutu d'autonomía, estatutu que ye fundamental que recueya los drechos llingüisticos de los asturfalantes d'igual mena qu'a los que falen castellán.

Como ye vezu nun faltaron representantes políticos de toa triba...dende los yá veceros Valledor y Palacios, que paez que nun se quieren enterar de que lleven nel gobiernu 4 años, y que van a toes o cuasi toles manifestaciones pol asturianu de los caberos años, Xuan Xosé y Marqués qu'han d'amosar que tán pola oficialidá magar que, pasen per estes manifestaciones dacuando y a les que Marqués, al qu'enxamás nun sentí falar asturianu pasa cada 4 años, xente del PCPE que yá lleven tiempu amosando que quieren entamar a trabayar pol idioma, y el mayor cortexu de toos, Unidá, coalición que munchos califiquen d'elleutoralista, pero que foi quien a atropar tres de les sos pancartes a unes 250 persones con banderes d'Andecha Astur ya Izquierda Asturiana.

Pero meyor que lo veais nesti video:


No que cinca a la cellebración entamada pola Academia, xunto dempues de la manifestación y de la llectura del manifiestu de la mesma, tamién cuntó cola presencia de los mesmos representantes políticos a los que s'amestó Trevín, al paecer nuevu escritor de les nueses lletres al lleer un testu de so mentanto la llectura de rellatos na Xunta Xeneral.

Los actos desendolcaos pola Academia foron los que vienen darréu:

-Entamu musical a cargu d'Andrea Fernández Joglar, qu'interpretó a la gaita "Ecos de la Quintana" y "La Xota'l Centru".
-Xunta Estraordinaria de l'Academia; cola llectura del acta per parte del secretariu Roberto González-Quevedo.
-Acoyida de la nueva académica de númberu.
-Pallabres de Marta Mori d'Arriba.
-Discursu institucional de la Presidenta de l'Academia.
-Esbilla de poemes y llectura de los mesmos inxertos en Lletres Asturianes 95, por Sonia Avellaneda y Próspero Morán.
-Actuación del grupu Tejedor qu'interpretó; Muñeires pa Gordon Duncan, Jota la Punta, Añada pa Julia, Seique non (n'alcordanza a Ígor Medio y Carlos Redondo) y Saltón d'Iyana, amás de 2 temes más a pidimientu popular.
-Y per últimu la interpretación a la gaita del Himnu d'Asturies, que foi acompangáu polos cientos de persones en pie qu'ellí mos aconceyamos.

Toos estos actos tuvieron salpicaos de pidimientos d'oficialidá, glayíos de ¡Puxa Asturies! y un ¡Izquierda Unida nun traiciones! dirixíu a Valledor mui graciosu.

Y en sofitu a la candidatura d'Unidá pa esparder los sos videos y materiales dende tolos medios posibles apurrovos equí'l video del so cortexu na mani:


Un saludu.

Hugo Chávez, verdaes como puños

El presidente de Venezuela Hugo Chávez llanzó fuertes crítiques escontra lo que considera un “clube d'ex-presidentes” qu'emitieron estremaos pronunciamientos críticos al so Gobiernu, lo graciosu ye, qu'especialmente (al igual que coles sos declaraciones sobre Bush) s'ensaña col ex-presidente del estáu español José María Aznar, al que noma facista, lacayu de Bush y amás comparalu con Hittler. Pero meyor sedrá que lo veais colos vuestros güeyos.


Un saludu.